Вы находитесь на сервере

Вы находитесь на сервере "Россия Православная"

Сайт переехал по адресу http://ioannrus.ru/

Житие Иоанна Русского

Родился и конце XVII века в Малороссии. Служил солдатом в армии Петра I и участвовал в русско-турецкой войне. Был взят в плен. Турки безуспешно пытались обратить его в мусульманскую веру. Хозяин, видя бесстрашие пленника, перестал его мучить и принуждать отречься от православия, поручив следить за скотом. Здесь же в стойле была поставлена для Иоанна постель. Несмотря на то, что окружающие часто издевались над Иоанном, видя его усердие в работе, святой не только продолжал стараться, но при случае помогал хозяевам в работе и утешал в беде. Добросердечие святого пришлось по душе главе дома. Он стал настолько доверять Иоанну и уважать его за честность, что предложил жить, как свободному. Однако подвижник предпочел остаться на конюшне, где никто не мешал ему каждой ночью молиться Богу. Иногда по ночам он приходил для молитвы к храму велико-мученика Георгия. В этом же храме по праздникам он причащался. Несмотря на свою бедность, всегда помогал нуждающимся. Господь явил через своего святого и явные чудеса. Так, когда хозяин находился в путешествии в дальних краях, родственники очень горевали, что он не участвует в праздничной семейной трапезе. Тогда по тайной молитве святого хозяину чудесным образом было перенесено блюдо с пловом с семейного стола. Блюдо было из фамильного сервиза, а плов был горячим. Праведная кончина святого последовала 27 мая 1730 года после приобщения Святых Тайн Христовых. Хозяин позвал священ-ников. На погребении были все христиане, жившие в Прокопии. Через три с половиной года были обретены его нетленные мощи и перенесены в храм вмч. Георгия. Нового святого стали почитать не только православные, но и армяне, и турки. В 1881 году часть мощей была перенесена в русский Пантелеимонов монастырь на Афоне. Другая часть в 1924 году была помещена в храме св. Иоанна Русского на острове Эвбия, где находится и по сей день. К святым мощам стекаются паломники со всей Греции. Многие говорят о св. Иоанне как о молитвеннике и заступнике за землю русскую.


 

 

Святой исповедник Иоанн Русский родился в конце XVII века в Малороссии и воспитывался в благочестии и любви к Церкви Божией. По достижении зрелого возраста он был призван на воинскую службу, служил простым солдатом в армии Петра Первого и участвовал в русско-турецкой войне. Во время Прутского похода 1711 года Иоанн вместе с другими воинами был взят в плен татарами, которые продали его начальнику турецкой конницы. Тот привез русского пленника к себе на родину, в Малую Азию, в селение Прокопий (по-турецки Уркюп). Пленных воинов-христиан турки старались обратить в мусульманство: одних уговорами и соблазнами, других, более стойких, избивали и мучили. Святой Иоанн не прельстился обещанными земными благами и мужественно переносил жестокости, унижения и побои. Его часто мучил хозяин в надежде, что его раб примет мусульманство. Однако святой Иоанн решительно противился воле своего господина и отвечал: "Ни угрозами, ни обещаниями богатства и наслаждений ты не сможешь отклонить меня от святой моей веры. Я родился христианином, христианином и умру". Смелые слова, и твердая вера исповедника, его бесстрашие и праведная жизнь смирили жестокое сердце господина. Он перестал мучить и поносить пленника, не принуждал больше к отречению от христианства, а заставил только ухаживать за скотом и содержать в порядке стойло, в углу которого была постель святого Иоанна.

С утра до позднего вечера угодник Божий служил своему господину, добросовестно исполняя все его приказания. В зимнюю стужу и в летний зной, полунагой и босой он исполнял свои обязанности. Другие рабы нередко издевались над ним, видя его усердие. Праведный Иоанн никогда не сердился на них, напротив, при случае помогал им в работе и утешал в беде. Такое искреннее добросердечие святого пришлось по душе хозяину и рабам. Хозяин стал настолько доверять праведному Иоанну и уважать за честность и благородство, что предложил ему жить как свободному и поселиться, где он сам пожелает. Однако подвижник предпочел остаться в помещении конюшни, где каждую ночь мог беспрепятственно подвизаться в молитвенном уединении, укрепляясь в добре и любви к Богу и людям. Иногда он покидал свое тихое убежище и под покровом ночи приходил к храму святого великомученика Георгия, где на паперти усердно молился, преклонив колени. В этом же храме по праздникам он причащался Святых Христовых Таин.

В то же время праведный Иоанн по-прежнему служил своему господину и, несмотря на свою бедность, всегда помогал нуждавшимся и больным и делил с ними свою скудную пищу.

В конце своей многотрудной и подвижнической жизни святой Иоанн занемог и, чувствуя приближение кончины, призвал священника, чтобы в последний раз получить благословение на исход. Священник, опасаясь со Святыми Дарами идти в дом турецкого начальника, вложил Их в яблоко и безопасно передал праведному Иоанну. Прославив Господа, он причастился Святых Христовых Тайн и отошел к Богу. Праведная кончина святого исповедника Иоанна Русского последовала 27 мая 1730 года. Когда хозяину сообщили, что раб Иоанн умер, он позвал священников и передал им тело святого Иоанна, которые погребли его по христианскому обычаю. На погребение собрались почти все христиане, жившие в Прокопии, и сопровождали тело праведника на христианское кладбище.

Через три с половиной года священник был чудесно извещен во сне о том, что мощи святого Иоанна пребывают нетленными. Вскоре святые мощи праведника были перенесены в храм святого великомученика Георгия и положены в специальной раке. Новый угодник Божий стал прославляться неисчислимыми благодатными чудесами, известность о которых распространилась в отдаленные города и селения. Верующие христиане из разных мест приходили в Прокопий для поклонения святым мощам Иоанна Русского и получали по его святым молитвам благодатные исцеления. Нового святого стали почитать не только православные христиане, но и армяне, и турки, обращаясь с молитвенным прошением к русскому святому: "Раб Божий, не обойди нас своей милостью".

В 1881 году часть мощей святого Иоанна была перенесена в Русский монастырь святого великомученика Пантелеймона иноками Святой Афонской Горы, до этого чудесно спасенными угодником Божиим во время опасного путешествия. На средства этого монастыря и жителей Прокопия в 1886 году начато строительство нового храма, так как храм святого великомученика Георгия, где находились мощи святого Иоанна, обветшал.

15 августа 1898 года был освящен новый храм во имя святого Иоанна Русского, по благословению вселенского патриарха Константина V, кесарийским митрополитом Иоанном.

В 1924 году жители Прокопия Кесарийского, переселяясь на остров Эвбею, перенесли с собою и мощи святого Иоанна Русского. Несколько десятилетий они находились в храме святых равноапостольных Константина и Елены в Новом Прокопии на Эвбее, а в 1951 году перенесены в новый храм во имя святого Иоанна Русского, к которому стекаются тысячи паломников из всех уголков Греции, особенно в день его памяти, 27 мая. Праведный Иоанн Русский широко почитается на Святой Горе Афон, особенно в Русском Пантелеимоновом монастыре.

Молитвы

Тропарь праведного Иоанна Русского

глас 4

На Небеси предстоя Святей Троице,/ праведне блаженне Иоанне,/ земный ангеле, Божий человече,/ с Безплотными лики славословиши любовь неизреченную,/ в Церкви первородных со святыми водворялся,/ о нас, сущих на земли, возносиши молитвы/ к Содетелю всех и Спасу,/ да подаст мир всему миру,/ Церквам на земли благостояние и соединение всех,/ чтущих Сына Божия, во плоти пришедша,/ во святем Теле Христа Иисуса,/ еже есть Церковь Бога Живаго,/ во спасение рода человеческаго.

Тропарь праведного Иоанна Русского

глас 4

От земли пленения твоего/ воззвавый тя к Небесным селением,/ Господь соблюдает невредимо и цельбоносно тело твое,/ праведне Иоанне,/ ты бо, в России ятый и во Асию проданный,/ посреде, агарянского злочестия благочестно пожил еси во мнозе терпении/ и, сеяв зде слезами,/ жнеши тамо неизглаголанною радостию.// Темже моли Христа Бога спастися душам нашим.

Ин тропарь праведного Иоанна Русского

глас 4

От земли Призвавший тя в Небесныя обители/ сохраняет и по смерти нетленное тело твое, святе,/ ты бо яко пленник приведен бысть в Азию,/ идеже и уподобися Христу./ Сего ради моли Его спастися душам нашим.

Кондак праведного Иоанна Русского

глас 4

Евангельския любве служителя,/ правды Божия ревнителя,/ чистоты душевныя и телесныя хранителя,/ веру Христову исповедавша в страданиих,/ праведнаго Иоанна ублажаем и почитаем днесь/ и, житием его назидающеся, поем:/ радуйся, молитвенниче наш, от Бога прославленный.

Кондак праведного Иоанна Русского

глас 8

В честней памяти твоей, святе,/ веселится о тебе Россия,/ во благочестии тя воспитавшая,/ и целебным мощем твоим радуется Асия,/ идеже узкий путь прошед страдальческаго плена и постнических подвигов,/ сосуд честен явился еси Божия благодати,/ еяже проси и нам, чтителем твоим, да зовем ти:// радуйся, Иоанне, благодати тезоимените.

Ин кондак праведного Иоанна Русского

глас 4

Ныне приспе память славных, святе отче, дел твоих,/ веселяще благочестивыя души,/ верно чтущия тя, Иоанне.

Молитва праведному Иоанну Русскому

О великий угодниче Божий, святый праведный Иоанне Русский, просиявый в земли Ассии равноангельным житием твоим, ревностию о Господе и подвигами во исповедании веры Христовы, града Неопрокопиона и всея земли Эллады пресветлое украшение, богохранимей стране нашей, людем ея и во всем мире живущим православным христианом помоще и крепкое заступление! Благодарим Господа, дивнаго во святых Своих, в вере истинней непоколебимо тя утвердившаго, в стоянии за исповедание ея укрепившаго и доброе скончание подвига многотруднаго даровавшаго, последи же многая и великая чудеса нам явившаго чрез многоцелебную раку мощей твоих. Ныне, предстоя Небесному Царю, испроси у Него избавити вся грады и веси страны нашея и земли Эллады от глада, труса, мраза, огня, смертоносных болезней, от нашествий иноплеменных и междоусобных браней. Помози всем путешествующим, болящим, в заточении сущим, в скорбех и гонениих за святую веру Православную терпящим. Соедини всех православных людей любовию ко Христу Богу нашему и Церкви Его Святей, даруй нам дух любве и мира к братскому единению всех верных. Умоли Господа, да подаст нам дух покаяния и сокрушения о гресех наших и всесильною Своею благодатию да поможет и укрепит в борьбе со страстьми и похотьми, да дарует нам дух смирения и кротости, дух братолюбия и незлобия, дух ревности по Бозе и спасении ближних. Помяни и нас, грешных, молящихся тебе: страждущих и болящих исцели, скорбящих утеши, бедствующим скорую помощь подай, всем же чтущим и любящим тя испроси христианскую кончину живота безболезненну, непостыдну, мирну и добраго ответа на Страшнем Судищи Христове. Буди нам помощник и покровитель во спасение, да твоими молитвами сподобимся в нынешнем и будущем веце прославляти в Троице славимаго Бога, Отца и Сына и Святаго Духа, ныне и присно и во веки веков. Аминь.

Каноны и Акафисты

Канон праведному Иоанну Русскому

глас 2

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Припев: Святый мучениче Иоанне, моли Бога о нас.
Пресветлым озаряемь светом Солнца Правды, просвещение испроси мне, омраченному, воспети твое, Богосветле, светозарное торжество.
Святый мучениче Иоанне, моли Бога о нас.
Уды вся умертвив, мудре, в чистом сердце твоем имел еси Христа, умертвивша и стерша главу змия и от яда того избавльша человеческое естество.
Слава: В законе Господни поучался, был еси, яко древо, еже благий плод свой даде во время свое, приял бо еси по кончине, достославне, благодать врачевати призывающия тя.
И ныне: Тя, Всепетая Приснодево, исповедающии Богородицу, утверждение и предстательство имамы и, прибегающе к Тебе, бури житейския и искушений избавляемся.

Песнь 3

Ирмос: Утверди нас в Тебе, Господи, Древом умерщвлей грех, и страх Твой всади в сердца нас, поющих Тя.
Святый мучениче Иоанне, моли Бога о нас.
Просия святое житие твое, блаженне, во Асии и озаряет светом чудес, но проси и нам благодати еже хотети и еже деяти благая, чтущим память твою.
Святый мучениче Иоанне, моли Бога о нас.
Не дал еси сна очима твоима, дондеже успил еси, достохвальне, безчинная двизания востающая на дух плоти твоими ко Господу всенощными молении.
Слава: Непобедимою силою Креста Христова демонская победив устремления, явился еси виновник спасения многих, помощник сый притекающих к мощем твоим.
И ныне: Яко чертог одушевлен Божий и кадильницу мысленнаго и светоноснаго Угля, величаем Тя, Богородице, зовуще: радуйся, Ходатаице спасения нашего.

Господи, помилуй (трижды).
Седален, глас 4-й
Был еси пленник на земли, Богомудре, всяко озлобление претерпевая, добродетели, яко же фимиам благовонен и жертву благоприятну, принесл еси Богу, Егоже моли даровати согрешений очищение чтущим святую память твою.
Слава, и ныне: Ты прибежище наше еси, и сила и утешение, Богородице Пречистая, се бо Иже всех Господь, рождься от Тебе, Деву Божественную Тя соблюде по рождестве и Небесе и земли Царицу сотвори, тем Тя вси недостойными усты славим.

Песнь 4

Ирмос: Услышах, Господи, слух Твой и убояхся, разумех дела Твоя, и дивихся, и возопих: слава силе Твоей, Господи.
Святый мучениче Иоанне, моли Бога о нас.
Душу свою украсил еси, плотское умертвив мудрование, темже Небесных красот еси зритель.
Святый мучениче Иоанне, моли Бога о нас.
Праведен был еси и незлобив, истинен же и непорочен, верен и богочестив, прехвальне.
Слава: Божественным смирением возвышаемь, врага смирил еси, блаженне, на Небеси и на земли славен явлься.
И ныне: Спасай стадо Твое, Мати Божия, безвредно от всякаго зла, Тя бо во обстояниих имамы избавление.

Песнь 5

Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим, иного бо, разве Тебе, бога не знаю.
Святый мучениче Иоанне, моли Бога о нас.
Неблагороден раб по телу сотворься, благороден нрав в души имел еси, пречестне, все твое желание на Бога Всевидца возложил еси.
Святый мучениче Иоанне, моли Бога о нас.
Богоугодно течение свое на земли совершившу ти, со благоугодившими Богу ныне ликуеши, моляся о почитающих преставление твое, Богоизбранне.
Слава: Чудо зрится на тебе, славне, како по преставлении соблюдается нерушимо, благовонно и целебно тело твое судьбами Прославльшаго Тя.
И ныне: Исполни уста наша хваления Твоего, Госпоже, и покажи ны другий десятострунный псалтирь очищением сугубыя чувств пятерицы.

Песнь 6

Ирмос: Глас глагол молебных от болезненныя, Владыко, души услышав, от лютых мя избави: Един бо еси нашего спасения виновен.
Святый мучениче Иоанне, моли Бога о нас.
Яко крин благовонен, израсти тя Россия, и, яко шипок красен, был еси посреде терния агарянскаго, облаговонившей тя благодати Божией.
Святый мучениче Иоанне, моли Бога о нас.
Яко финикс процвет, благодати тезоименне, сладостию плодов услаждаеши чувства верных, яко кедр несокрушим, явлься бурею напастей и искушений.
Слава: Яко многоценное сокровище, в земли крыющееся, мощи своя явил еси благочестивым в видении, и теми недуги врачуеши, подай от Бога освящение лобызающим я.
И ныне: Яко Мати всех даров Подателя явилася еси, сад многоцветен и рай сладкодышущ, плодами Духа ущедряющ и благодатьми облагоухающ поющия Тя.

Господи, помилуй (трижды). Слава, и ныне:
Кондак, глас 8-й
В честней памяти твоей, святе, веселится о тебе Россия, во благочестии тя воспитавшая, и целебным мощем твоим радуется Асия, идеже узкий путь прошед страдальческаго плена и постнических подвигов, сосуд честен явился еси Божия благодати, еяже проси и нам, чтителем твоим, да зовем ти: радуйся, Иоанне, благодати тезоимените.
Икос
Како по достоянию восхвалим тя, доблемудре, подвиги твоими страсти умертвивша, плоть поработивша духу и врага победивша? Кто, слышав великое твое терпение и смирение, не удивится? Еже ко всем кротость и беззлобие, к скорбящим сострадание, к сущим в бедах и недузех поможение. В невечернем убо дни Царствия Божия, с праведными праведно наслаждаяся, молися о чтущих память твою, да зовем ти: радуйся, Иоанне, благодати тезоимените.

Песнь 7

Ирмос: Образу златому на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Святый мучениче Иоанне, моли Бога о нас.
День празднственный совершаем днесь блаженнаго успения твоего, светозарне, в немже светильник нося, полн елея благих дел, вшел еси в светлый чертог и Жениху душ вопиеши: благословен еси, Боже отец наших.
Святый мучениче Иоанне, моли Бога о нас.
Душу удобрив, Богомудре, ралом молитвы, воздержание посеяв и оросив е слезами, пожал еси класы чистоты, и праведности, и с праведными взываеши укрепльшему тя Христу: благословен еси, Боже отец наших.
Слава: Святых души, праведных лик и Безплотных умов ополчение прияша тя, сликовствующа им, досточудне, нетленным одеянием славы украшенна и с ними поюща: благословен еси, Боже отец наших.
И ныне: На Тя, Владычице, надежду мою от души возложих всю и чаю от Тебе Божественнаго утешения, благодатную помощь низпосли ми, стезю показуя, к Небеси возводящую, во еже пети: благословен еси, Боже отец наших.

Песнь 8

Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки.
Святый мучениче Иоанне, моли Бога о нас.
Святейших и Животворящих Таин возжелевшу тебе, прехвальне, приобщитися при исходе, принесени быша во яблоце, ихже прияв, воспарил еси к Небесным.
Святый мучениче Иоанне, моли Бога о нас.
Доброту Создателя, юже зрел еси зде, яко в зерцале и гадании, ныне, прешед к Вышним, яснейше зриши разрешшимся тебе зерцалом, Богоблаженне.
Слава: Течения сладкая исцелений искапают потове твои и скорби твоя – радование с верою притекающим к мощем твоим во славу Христа Бога нашего.
И ныне: Святейший храме Спаса нашего, преславный Его престоле, превысокое Небо и Раю словесный, отверзи нам, Преблагословенная Богородительнице, райския двери.

Песнь 9

Ирмос: От Бога Бога Слова, неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии, единомудренно песньми величаем.
Святый мучениче Иоанне, моли Бога о нас.
Богатство некрадомое собрав, еже ни червь, ни тля тлит, и, яко же некий кораблец, отплыв от земли, пристанища всепокойнаго и блаженства вечнаго достигл еси.
Святый мучениче Иоанне, моли Бога о нас.
Горнее Царство, Вышний град, Божий рай, праведных наслаждение и свет немерцающ обрести сподобился еси, идеже нас помяни, воспевающих тя, всехвальне.
Слава: С сонмом праведных и всех святых ликуя, приснопамятне, моли всех Создателя и Бога, да сподобит спасаемых части память твою празднующих.
И ныне: Приими, Владыко, ходатайство о нас Матере Твоея и егоже прославил еси, Иоанна праведнаго, ихже мольбами не лиши нас благих Твоих, уготованных любящим Тя.

Акафист праведному Иоанну Русскому

Кондак 1

Избраннаго исповедника Христова и чудотворца предивнаго, поборника святыя веры Православныя, Русскою землею рожденнаго и в земли Эллады возсиявшаго, святаго праведнаго Иоанна похвальными песньми почтим; ты же, угодниче Божий, яко предстояй пред престолом Царя Славы, от всяких нас бед свободи, с любовию и благодарением зовущих ти: Радуйся, святый праведный Иоанне, скорый помощниче и преславный чудотворче.

Икос 1

Ангелов Творец и всея твари Создатель избра тя, праведне Иоанне, во еже народи Руси и Эллады духовно соединити, и яви тя Церкви Своей Святей великаго чудотворца, имущаго к Нему дерзновение молитися о исцелении недугов душевных и телесных, о избавлении от всяких бед и скорбей. Темже мы, сынове русстии, благоговейне преклоняем пред тобою колена телесная и сердца наша и умиленно глаголем:

Радуйся, земный Ангеле и человече небесный.

Радуйся, благодати тезоименитый.

Радуйся, кротости и послушания образе.

Радуйся, молитвы благоуханное кадило.

Радуйся, терпением злобу мира сего победивый.

Радуйся, венцем исповедническим от Господа украшенный.

Радуйся, земли Асии подвиги своими озаривый.

Радуйся, чудесы твоими землю Эллады наполнивый.

Радуйся, светлая звездо Русския земли.

Радуйся, Отечество земное молитвами твоими не оставляяй.

Радуйся, Христа ради на земли пострадавый.

Радуйся, с Ним на Небесех воцаривыйся.

Радуйся, святый праведный Иоанне, скорый помощниче и преславный чудотворче.

Кондак 2

Видя Христос Господь сердца твоего благое намерение, Иоанне блаженне, предначерта ти тернистый и многотрудный путь спасения: егда был еси с воинством царя Петра, плениша тя агаряне и в раба продаша в землю Асии, во град Прокопион, идеже ты пребыл еси непоколебим в вере Православней и жизнь твою посвятил еси Богу, непрестанно усты и сердцем воспевая Ему: Аллилуиа.

Икос 2

Разум богопросвещенный и веру несумненную имел еси, святче Божий, егда гнева агарян не устрашився, исповеда себе христианина быти и радостно восприял еси биения, узы железныя, огнем жжение и многи муки нестерпимыя. Темже вси, таковому твоему дерзновению и мужеству дивящеся, глаголем:

Радуйся, во страсе Божии добре воспитанный.

Радуйся, закону Господню верно наученный.

Радуйся, от юности твоея всего себе Богу предавый.

Радуйся, всегда в молитве утешение духовное обретавый.

Радуйся, злобы агарян не устрашивыйся.

Радуйся, муки нестерпимыя победно претерпевый.

Радуйся, за Господа распятаго огнем от мучителей опаленный.

Радуйся, Христовым страстем в телеси твоем приобщивыйся.

Радуйся, терпение крепкое во страданиих явивый.

Радуйся, от веры Православныя не отступивый.

Радуйся, Христа единаго всем сердцем возлюбивый.

Радуйся, воине Христов непобедимый.

Радуйся, святый праведный Иоанне, скорый помощниче и преславный чудотворче.

Кондак 3

Силою Вышняго укрепляемь, со дерзновением проповедал еси Единаго Истиннаго Бога пред мучители твоими. Злочестивый господин твой, надеяся уловити тя и к вере своей привлещи, тело твое нача истязати. Ты же, страстотерпче Христов, жестокая биения от него претерпевая, укрепляющему тя Богу из глубины сердца воспевал еси: Аллилуиа.

Икос 3

Имея в души своей пламенное желание последовати Агнцу Божию, пострадавшему спасения нашего ради, праведне Иоанне, не убоялся еси мучений и молился еси за враги твоя и мучители, вопия: «Ничтоже мя разлучит от любве Твоея, Христе Боже», и от веры во Христа никакоже отступил еси. Сего ради величаем тя сице:

Радуйся, адаманте веры Христовы.

Радуйся, о всех христианах усердный молитвенниче.

Радуйся, даже до крове во исповедании Христа пострадавый.

Радуйся, в мужестве непоколебимом пребывый.

Радуйся, яко вся мучения претерпел еси, благодатию свыше укрепленный.

Радуйся, свирепство мучителей победивый.

Радуйся, страстем Христовым мужественный подражателю.

Радуйся, врагов Церкве Христовы посрамителю.

Радуйся, веру, надежду и любовь к Богу до конца сохранивый.

Радуйся, подвигом твоим христиан Прокопиона возвеселивый.

Радуйся, в сердце твоем образ Христа носивый.

Радуйся, страданьми за Него мзду многу на Небесех получивый.

Радуйся, святый праведный Иоанне, скорый помощниче и преславный чудотворче.

Кондак 4

Буря лютых мук и страстей мира сего не потопи корабля души твоея, праведне Иоанне, ты бо благодушие в телеснем пленении явил еси, кротость же, незлобие и смирение, и якоже Ангел на земли пожил еси, в трудех, посте и молитве подвизаяся, кесарю - кесарево, а Божие - Богу отдавая, по слову Господа, нощию же без сна пребывая, о прощении своих согрешений, наипаче же о творящих ти обиды и озлобления молился еси, в сокрушении сердечнем поя Богу: Аллилуиа.

Икос 4

Слышавше и видевше дивное твое житие, кротость же, смирение и премногую добродетель, гонители твои удивишася и прославляху тебе, яко человека праведна. Егда же лютый господин твой узре в дому своем молитв твоих ради изобилие во всем и даде тебе ослабу, ты, огнем любве ко Господу окриляемь, умножил еси труды подвижническия, на всяку нощь течением слез помост притвора церковнаго в молитве орошая. Помози убо и нам подражати тебе, укрепи нас, от мглы страстей избави и даруй мужество духовное всем прибегающим ко предстательсту твоему и вопиющим тебе таковая:

Радуйся, унижением твоим евангельскому Лазарю уподобивыйся.

Радуйся, терпением твоим с многострадальным Иовом сравнивыйся.

Радуйся, смирившемуся нас ради Христу усердно подражавый.

Радуйся, подвигом твоим Ангелов удививый.

Радуйся, трудниче прилежный, земному господину верно послуживый.

Радуйся, кротостию и благостию своею сердце его победивый.

Радуйся, за творивших ти обиды и озлобления Богу молитвы возносивый.

Радуйся, злобу их на милость преложивый.

Радуйся, на паперти церковней нощи в молитвах проводивый.

Радуйся, подвижниче благочестия и исповедниче, во граде Прокопионе возсиявый.

Радуйся, любве и милосердия ко всем людем исполненный.

Радуйся, яко за ненавидящих и обидящих нас молитися подвизаеши.

Радуйся, святый праведный Иоанне, скорый помощниче и преславный чудотворче.

Кондак 5

Боготечная звезда, от Руси возсиявшая, явился еси, блаженне Иоанне, блистая чистотою ангельскою и лучами добродетелей твоих земли Авии и Эллады озарив. Егда же ты болен бе, и день своея кончины от Бога ведая, восхотел еси причаститися Святых Христовых Таин, иерей, Богом вразумленный, принесе тебе Святыя Дары во яблоце, ихже прияв, праведную душу твою в руце Божии предал еси, и светильник нося, полн елея добрых дел, вшел еси в Царствие Небесное, во еже непрестанно со всеми святыми воспевати всех святых Святейшему Слову: Аллилуиа.

Икос 5

Видевше людие града Прокопиона богоугодное житие твое и блаженную кончину, со слезами и благоговением погребоша тело твое во храме святаго великомученика Георгия. По кончине же твоей мнози недужнии - не токмо православнии, но инославнии и агаряне получиша исцеления у гроба твоего, благодарение Богу приносяще, и тебе, яко теплому молитвеннику о всех страждущих, взываша тако:

Радуйся, яко сердце твое покаянными слезами омыл еси.

Радуйся, слезами и молитвами к смерти себе приуготовавый.

Радуйся, яко всех обидящих тя простил еси.

Радуйся, незлобием Христовым духа злобы победивый.

Радуйся, в чистоте душу и тело твое сохранивый.

Радуйся, кончину свою предуведевый.

Радуйся, праведно жизнь земную скончавый.

Радуйся, возлюбившему тя Господу душу твою предавый.

Радуйся, венцем безсмертия от Господа увенчанный.

Радуйся, вечней радости с Ним по смерти приобщивыйся.

Радуйся, яко церковь великомученика Георгия прият честное тело твое.

Радуйся, яко во обителех Небесных водворися святая душа твоя.

Радуйся, святый праведный Иоанне, скорый помощниче и преславный чудотворче.

Кондак 6

Проповедником чудес и славы Божия явися клирик некий града Прокопиона, егда узре в соннем видении блаженнаго Иоанна, повелевающаго открыти гроб, в немже обретаются нетленныя мощи его. Темже вернии молитвенно возопиша ко Господу, да явит Он людем мощи Своего избранника, зовуще со благодарением Ему: Аллилуиа.

Икос 6

Возсиял еси, яко новое светило всему христианскому роду, праведне Иоанне, егда Божиим изволением обретено бысть нетленное и благоуханное тело твое, источающее обилие чудес всем с верою к твоему заступлению прибегающим. Темже уврачуй и облагоухай нас, верою и любовию тебе взывающих:

Радуйся, на земли, яко беплотен, поживый.

Радуйся, сосуде Божественныя благодати.

Радуйся, по смерти священнику церкве великомученика Георгия явивыйся.

Радуйся, праведниче Божий, в чудесех просиявый.

Радуйся, яко Христос с небесе призре на святыя мощи твоя.

Радуйся, яко столп огненный над ними показася.

Радуйся, святыя мощи твоя, якоже сокровище велие явити изволивый.

Радуйся, благоуханием от них верных возвеселивый.

Радуйся, яко нетлением тело твое прослави Господь.

Радуйся, яко мощей твоих демони трепещут.

Радуйся, яко во Царствии Небеснем со святыми пребываеши.

Радуйся, яко и нас, грешных, на земли не оставляеши.

Радуйся, святый праведный Иоанне, скорый помощниче и преславный чудотворче.

Кондак 7

Хотящим врагом град твой разорити и мощи твоя огню предати, явися страшное и преславное чудо: воини увидеша тя, Иоанне, стояща посреде огня и оставити град грозно им повелевающа. Тии же ужасошася видению, вон бежаша и никоегоже зла сотвориша. Вернии же людие паки обретоша мощи твоя, к нимже и мы припадающе вопием Богу победную песнь: Аллилуиа.

Икос 7

Новаго тя чудотворца и молитвенника во времена последняя дарова нам Человеколюбец Господь, егда оскуде вера, любы охладе, стихии земныя поколебашася. Темже молим тя, праведне Иоанне, не остави нас, грешных и слабых, в годину испытаний, укрепи молитвами твоими всех любящих тя и вопиющих ти таковая:

Радуйся, верных надеждо и заступление.

Радуйся, неверных страх и посрамление.

Радуйся, яко подвиги твоими град Прокопион освятил еси.

Радуйся, яко молитвами твоими землю Эллады облагоухал еси.

Радуйся, свет Христов в сердце твоем носивый.

Радуйся, тьму жизни нашея светом Христовых заповедей озаряяй.

Радуйся, о людех страны Греческия молитвенниче неусыпный.

Радуйся, помощниче людем русским Богодарованный.

Радуйся, от разорения град твой и храм оградивый.

Радуйся, православных христиан прибежище.

Радуйся, яко ныне со всеми святыми престолу Божию предстоиши.

Радуйся, яко неизреченную славу Господню созерцаеши.

Радуйся, святый праведный Иоанне, скорый помощниче и преславный чудотворче.

Кондак 8

Странником и пришельцем был еси в стране пленения твоего, угодниче Божий, взыскующим Горняго Иерусалима Небеснаго, и тако странное для сущих от мира житие пожив, добродетельми многими к Богу приблизился еси, научая всех верных искати едино на потребу, еже есть богоугождение. Сего ради Сам Господь, видя смирение твое, возвеличи тя благодатию Своею, Егоже восхваляюще, поем ангельскую песнь: Аллилуиа.

Икос 8

Весь был еси любве Божественныя исполнен, блаженне, светом благодати Божия сияя пред человеки, и святыя мощи твоя - врачебница есть духовная, сокровище чудес, небесных аромат вместилище. Сего ради, дерзновение велие ко Господу имея, молишися за христианы, во всем мире живущия, и верою тя на помощь призыващим пособствуеши. Не остави убо и нас благодатною твоею помощию и заступлением, да благодарно тебе зовем:

Радуйся, даром любве к Богу и ближним исполненный.

Радуйся, всех приходящих к тебе скорый утешителю.

Радуйся, верою чудодейственною озаренный.

Радуйся, в молитвах и бдениих учителю наш предивный.

Радуйся, благодатную росу исцелений верным источаяй.

Радуйся, в милости неистощимый.

Радуйся, недугов лютых прогонителю.

Радуйся, православных людей тихое пристанище.

Радуйся, в сониих и видениих страждущих посещаяй.

Радуйся, в бедах и напастех помощь им подаваяй.

Радуйся, странниче земный, во Отечество Небесное вшедый.

Радуйся, во всем мире христианстем прославленный.

Радуйся, святый праведный Иоанне, скорый помощниче и преславный чудотворче.

Кондак 9

Всякое естество человеческое удивися, видевше чудеса преславная, от мощей праведнаго Иоанна истекающия, мнози убо восхотеша части их во инии места и грады отделити, обаче всем хотящим взяти их ты, угодниче Божий, возбранял еси. Егда же святогорцы русскаго монастыря моляхуся, да часть мощей твоих даруется им, благоволил еси принести на Афон, в Сад Богоматере, десную руку твою в благословение им и утешение. И бысть велие торжество: вси иноцы обители Пантелеимоновой, колена преклоняюще, сретоша десную руку твою от града Прокопиона принесенную, воспевающе Богу благодарственную песнь: Аллилуиа.

Икос 9

Ветии многовещаннии не возмогут изрещи силу любве православных эллинов, иже изгнанни бывше от Прокопиона неверными, изнесоша мощи твоя, праведне Иоанне, на остров Эвбею, идеже воздвигоша велий благолепный храм во имя твое, в немже и положени быша многоцелебныя мощи твоя. Темже и мы, молящеся в храме сем и предстояще пред ракою твоею, чудесы благоухающей, прилежно молим тя: услыши нас, твоего предстательства просящих и благоговейне вопиющих:

Радуйся, верных и неверных в бедах утешителю.

Радуйся, яко тобою прославляется вера христианская.

Радуйся, страну Греческую и людей ея возлюбивый.

Радуйся, яко смотрением Божиим мощи твоя на землю Эллады принесени быша.

Радуйся, храму, имени твоему посвященному, покрове, Богом данный.

Радуйся, града Неопрокопиона и всея земли Эллады святый покровителю.

Радуйся, мощами твоими Гору Афонскую освятивый.

Радуйся, нетленною десницею во обители Пантелеимоновой пребываяй.

Радуйся, братии Афонскаго вертограда в подвизех скорый помощниче.

Радуйся, яко во всей Церкви Христовой имя твое прославляется.

Радуйся, яко всей стране Гречестей, яко солнце незаходимое, сияеши.

Радуйся, яко и Отчизну твою, страну Русскую, не оставляеши.

Радуйся, святый праведный Иоанне, скорый помощниче и преславный чудотворче.

Кондак 10

Спасение в бедах и напастех восхотев дати Господь верным чадом Своим, дарова нам тя, угодниче Божий, приял бо еси благодать целити недуги всем притекающим к тебе с молитвою: кровоточивии бо и прокаженнии прикосновением к раце мощей твоих очищаются, глусии слышат, разслабленнии здрави бывают, слепии прозревают. Мы же, поминающе скорое заступление твое, благодарным гласом восхваляем Бога, поюще Ему песнь: Аллилуиа.

Икос 10

Стена еси стране Гречестей и народу ея благочестивому, праведне Иоанне, и необоримый заступник всем призывающим имя твое, зане тако благоволи Сам Господь - быти тебе защитником христиан не токмо земли Эллады, но всех любящих и чтущих тя людей православных. Темже Элладския Церкви людие, Афонских отец собори, Русския страны вернии и во всякой стране чтущии Бога восхваляют тя сице:

Радуйся, страже земли Эллады, нечестивыя отгоняяй.

Радуйся, всех благочестивых людей ея от бед избавляяй.

Радуйся, яко во всех странах живущим христианом благодатную помощь подаеши.

Радуйся, яко целебныя дары повсюду точиши.

Радуйся, от Господа власть на духи нечистыя приемый.

Радуйся, силою Божиею их изгоняяй.

Радуйся, оставленным врачами предивное поможение.

Радуйся, яко от смертоносных язв многих свобождаеши.

Радуйся, болящих младенцев присный врачевателю.

Радуйся, скорбящих их родителей благий утешителю.

Радуйся, проповедниче покаяния и ходатаю нашего спасения.

Радуйся, смиренномудрия и терпения учителю.

Радуйся, святый праведный Иоанне, скорый помощниче и преславный чудотворче.

Кондак 11

Пение всеумиленное приносим Христу Богу, прославльшему тя, праведне Иоанне, яко дарова нам великаго заступника, утешителя и молитвенника о спасении православных христиан, по всему лику земли обитающих. Темже славим тя, просяще твоего предстательства пред Господом о стране нашей, да избавимся от нашествий иноплеменных и междоусобных браней, и возможем в мире и тишине воспевати Христу Богу песнь: Аллилуиа.

Икос 11

Светозарный светильник Божия благодати явился еси, праведне Иоанне, духовным сиянием подвигов твоих и чудес просветивый земли Асии и Эллады, ты бо, Русскою землею рожденный, повсюду источаеши чудес величество и молишися о всех любящих и чтущих тя. Темже убо моли Христа Бога Отечеству твоему и всей стране Гречестей непоколебимыми и безмятежными быти, от навет вражиих и от агарянскаго нашествия их огради, воинству православному победу на враги даруй, да к тебе, яко крепкому о нас молитвеннику, взываем сице:

Радуйся, Церкви Вселенския Православныя преславное украшение.

Радуйся, о людех православных пред Богом дивный предстателю.

Радуйся, во дни бед и испытаний в земли Эллады чтущих тя не оставивый.

Радуйся, об Отечестве нашем и народе его теплый молитвенниче.

Радуйся, Ангеле земли нашея, во стране Гречестей прославленный.

Радуйся, и в Руси благоговейне почитаемый.

Радуйся, светильниче, омраченныя души просвещаяй.

Радуйся, лампадо златая, елеем милости исполненная.

Радуйся, радости духовныя чтущим тя подателю.

Радуйся, спасительное христиан прибежище.

Радуйся, яко тобою страстей очищение приемлем.

Радуйся, у престола Божия о нас, недостойных, ходатаю.

Радуйся, святый праведный Иоанне, скорый помощниче и преславный чудотворче.

Кондак 12

Благодать Духа Святаго, живущая в тебе, блаженне, дивно показася в нетлении твоих честных мощей, в чудесех от них и исцелениих, ихже любовию лобызающе, славим о тебе Христа Бога, дивнаго во святых Своих. Сего ради не забуди и нас, усердно призывающих тя во времена тяжких бед и напастей, и молитвами твоими от них избави, не престани ходатайствовати всем нам телеснаго здравия и душевнаго спасения, со благоговением чтущих святую память твою и поющих Богу: Аллилуиа.

Икос 12

Поюще подвиги многострадальнаго жития твоего, почитаем страдания, хвалим долготерпение, славим кротость и смирение, ублажаем святую твою кончину и почитаем тя, яко небеснаго предстателя нашего, ты бо от бед и скорбей избавляеши, недуги врачуеши, печали утоляеши всех почитающих тя. Благодарим и величаем прославившаго тя Господа, даровавшаго нам дивнаго молитвенника и чудотворца, Егоже умоли спастися всем поющим ти таковая:

Радуйся, добропобедный воине Царя Небеснаго.

Радуйся, великий Христов угодниче.

Радуйся, плачем и скорбьми временными утешения вечнаго сподобивыйся.

Радуйся, кротостию своею и смирением землю праведных унаследивый.

Радуйся, чистотою и целомудрием от Бога украшенный.

Радуйся, цветом неувядаемым почтенный на Небеси.

Радуйся, Ангельских Воинств собеседниче.

Радуйся, яко с преподобными и праведными светло торжествуеши.

Радуйся, милостивое заступление Божия Матере к нам приклоняяй.

Радуйся, светильниче, любовию своею нас освящаяй.

Радуйся, всех святых земли Русския сонаследниче.

Радуйся, яко предстоиши ныне со всеми святыми престолу Божию.

Радуйся, святый праведный Иоанне, скорый помощниче и преславный чудотворче.

Кондак 13

О пречудный и преславный чудотворче, святый праведный Иоанне, земли Русския благодатное рождение, подвижников Эллады похвало и украшение. Приими от любящих тя сердец малое сие моление и принеси его ко Христу Богу нашему, да сохранит нас от враг видимых и невидимых, от недуга и глада, от всякия скорби и внезапныя смерти, и сподобит вкупе с тобою во Царствии Небеснем непрестанно пети Спасителю нашему и Богу песнь: Аллилуиа.

(Этот кондак читается трижды, затем икос 1 и кондак 1)

Молитва первая

О великий угодниче Божий, святый праведный Иоанне Русский, просиявый в земли Ассии равноангельным житием твоим, ревностию о Господе и подвигами во исповедании веры Христовы, града Неопрокопиона и всея земли Эллады пресветлое украшение, богохранимей стране нашей, людем ея и во всем мире живущим православным христианом помоще и крепкое заступление! Благодарим Господа, дивнаго во святых Своих, в вере истинней непоколебимо тя утвердившаго, в стоянии за исповедание ея укрепившаго и доброе скончание подвига многотруднаго даровавшаго, последи же многая и великая чудеса нам явившаго чрез многоцелебную раку мощей твоих. Ныне, предстоя Небесному Царю, испроси у Него избавити вся грады и веси страны нашея и земли Эллады от глада, труса, мраза, огня, смертоносных болезней, от нашествий иноплеменных и междоусобных браней. Помози всем путешествующим, болящим, в заточении сущим, в скорбех и гонениих за святую веру Православную терпящим. Соедини всех православных людей любовию ко Христу Богу нашему и Церкви Его Святей, даруй нам дух любве и мира к братскому единению всех верных. Умоли Господа, да подаст нам дух покаяния и сокрушения о гресех наших и всесильною Своею благодатию да поможет и укрепит в борьбе со страстьми и похотьми, да дарует нам дух смирения и кротости, дух братолюбия и незлобия, дух ревности по Бозе и спасении ближних. Помяни и нас, грешных, молящихся тебе: страждущих и болящих исцели, скорбящих утеши, бедствующим скорую помощь подай, всем же чтущим и любящим тя испроси христианскую кончину живота безболезненну, непостыдну, мирну и добраго ответа на Страшнем Судищи Христове. Буди нам помощник и покровитель во спасение, да твоими молитвами сподобимся в нынешнем и будущем веце прославляти в Троице славимаго Бога, Отца и Сына и Святаго Духа, ныне и присно и во веки веков. Аминь.

Молитва вторая

О всеблаженный исповедниче Христов и великий чудотворче Иоанне, Эвбея скоровище, Греческия страны похвало и людей русских сродниче! Ты в пленении агарянском лютая биения и влас сожжение твердо за Христа претерпел еси, благочестием же своим, подвиги и чудесы верныя премного укрепил еси, неверныя же умягчил еси и просветил, по кончине же бесчесленными чудесы и исцеленьми просияваеши. Вемы, угодниче Божий, яко велие дерзновение имаши ко Господу, нам же, бедствующим, сострадаеши тако тепле, яко не терпиши и зрети ны в лютых недузех или тяжких скорбех сущими, и сего ради и непризываемый скоро притекаеши, телеса и души врачуя, бесы изгоняя, заблуждшия обращая, наипаче же от малых детей всякую болезнь и горесть отгоняя. Се бо и ныне греси мнози отяготиша ны и изнуряющими скорбьми души наша сотрошася, силы же телесныя оскудеша, и како унынию и тягостней печали противостати возможем, аще не ты сам, святче Божий, восстанеши по нас и противу врагов наших благодатне ополчишися! Испроси же, благоприятными твоими ко Господу молитвами, телесными недуги страждущим совершенное исцеление, всем же спасительное терпение и благодарение; скорби, бесовския наветы и искушения отврати; вся же, елика попустит Господь, научи во очищение понести благоразумне; нас же, во тьме неведения и забвения заповедей Божиих сущих, просвети, выну неуклонне творити волю Божию настави, бесплодия духовнаго разреши, очищение, освящение и просвещение душам нашим даруй; да с тобою вкупе выну и во веки веков прославим Всеблагаго Бога и Пречистую Богородицу, твоим всемощным заступлением. Аминь.